Tschave visenschoft, but tschibtschakero vakeripe taj uprelikeripe lakle

I Privati Pedagogischi Utschi Ischkola Burgenland te adabersch lakere vudara la Tschavengera Utscha Ischkolake pratscha. Buteder sar trin schel tschave ando phuripe usar schov dschi deschujek berscha, dikipe andi visenschoft taj ando forschinipe uschtidine, taj ande seminartscha la naturakera visenschoftaha, la technikaha, mle edijenca, la kunstaha, la virtschoftaha taj le uprelikeripeha, donde pumen bescharde. Erschtivar, te but tschibtschakero vakeripe, falato le programostar sina: Ande digitali medijengere verkschtotscha Tikni Martonate taj Erbate, o flogoskere grupnengere tschibtscha le Burgenlandistar ando maschkarutno punkto terdschonahi. Kada Tikni Martonate o burgenlanditiko horvacko ando dikipe terdscholahi, butschalinahi o tschave Erbate la ungrika tschibtschaha taj le Burgenland-Romanijiha. But tschave le pomoschagoskere siklipestar le farajnistar Roma-Service taj te andar o naphandlo siklipe Romani, upro terdschojipeskero than Erba, jek digitali but tschibtschakeri kipengeri kenva kerde, taj pasche lengere tschibtschakere taj digitali dschaniptscha, soraljarede. O kisetinipe le trin diveseskere seminaristar, i tradicijoneli schponsijona sina. Lengere keriptschenge o tschave o diplom „Heroj la visenschoftatar“ uschtidine.