Schero le pisinipeske: Roma Service Josef M. Schmidt, Ronja Klima

Ando 12to juni 2025 o Joschi Schneeberger le somnakune patijaripeskere cajchniha vasch barikane keriptscha pasche i republika Austrija, patijardo ulo. O Joschi Schneeberger nan tschak jek igen latscho bumbaschi, ov hatek te jek tschatschikano botschofteri le jazzistar taj le gypsy swingistar andar i Austrija hi. 

O Adolf „Joschi“ Schneeberger ando 10to juli 1957 Betschiste upro them alo. O Schneeberger, savo andar jek Sintijengeri familija al, o bumbakero cidipe ojs autodidakto siklino. 1982 leskeri karijera andi banda le Zipflo Weinrichistar kesdintscha, ande savi ov dschi 1990 cidlahi. Akor uso bandi le Harri Stojkastar taj la Elly Wrightatar kerinlahi taj la bandaha Gansch and Roses taj la Jazz-Gittiha te schunel taj te dikel lo sina. Ov te bare muschikaschtschenca, use genel o Benny Bailey, o Oscar Klein, o Allan Praskin, o Karl Ratzer, o Hans Salomon vaj o Häns’che Weiss butschalintscha, hatek poar lendar adaj te akarel.

Ando besch 1999 pro ajgeni trijo kertscha. Use leskero ajgeni kerdo sekstet, savo sajt o bersch 2007 del, te leskero tschau, o giteraschi Diknu Schneeberger genel. Dschi 2018 o Joschi Schneeberger te dscheno le Diknu Schneeberger trijostar sina, andar savo pe leskero ajgeni kvartet entviklintscha.

Vodschiha, kamipeha taj barikane dschanipeha ov i austritiki muschikakeri scena pedar deschberschengere pregintscha. Ada patijaripe jek soralo cajchn le aunprindscharipestar leskere kinstlerischi dschivipeskere keripestar hi.