Berschengero talalinipe „Nevo tschibtschakero prikdipe“ le Forum4Burgenlandistar

Telal o anav „Nevo tschibtschakero prikdipe“, tschetertekon, ando 10to april 2025, ando kulturakero- taj kongresiskero centrum Tikni Martona, o berschengero talalinipe tel likerdo ulo. O talalinipe neve kojenge uso prikdipe le flogoskere grupnengere tschibtschendar le Burgenlandistar pe vidmintscha taj ande anglevakeriptscha, dikiptscha ando tschibtschakero siklipe la muschikaha, naturaha taj le micinipeha dija.

Telal o but kherodaschtscha sina i thaneskeri rotkija Daniela Winkler, i Sabine Weisz, rektorkija la Privati Pedagogischi Utschi Ischkolatar Burgenland, i Karin Vukman Artner, vodaschkija le thanestar Ped/2 tschuliptschengero ischkolakero koja la sikadipeskera direkcijonatar le Burgenlandistar taj te o flogoskere grupnengere anglebeschaschtscha Emmerich Gärtner-Horvath, Josef Buranits taj Attila Somogyi.

Jek avro programoskero punkto le berschengere talalinipestar sina i presentacija la but tschibtschakera dschilengera kenvatar le flogoskere ischkolakere-religijonakere sikajipeske. Ischkolaschkiji taj ischkolaschtscha andar duj tschibtschakere ischkoli o scheroskero kipo ando keripe jeke feschtinipeskere beverbistar kerde. O and bitschade kipi ar terdscharde taj o jerinaschkiji taj jerinaschtscha uso mulatintschago patijarde ule.

I muschika jek but tschibtschakero tschajengero taj tschavengero chor, dschilenca andar i nevi dschilengeri kenva kertscha. Vodim ule o terne kinstlerkiji taj kinstlertscha le meschterkijendar taj meschterendar taj odolengere muschikakere pajtaschendar.

O Forum4Burgenland jek sikadipeskero forum la Privati Pedagogischi Utschi Ischkolatar Burgenland, la sikadipeskera direkcijonatar Burgenland taj le burgenlanditike flogoskere grupnengere bajrotschendar hi. Ov ando bersch 2019 le ciliha kerdo ulo, o flogoskere grupnengere tschibtscha burgenlanditiko horvacko, ungriko taj Burgenland-Romani ando pradipe te ledschel taj ando sikadipeskero than te soraljarel.